සජබයේ බෙදීමක් නැහැ 

රටේ ප්‍රශ්න වසන් කර ගැනීමට ආණ්ඩුව විපක්ෂයට මඩ ගහනවා 

විපක්ෂය ශක්තිමත් 

රටේ ප්‍රශ්න වසන් කර ගැනීම සඳහා විපක්ෂයේ බෙදීමක් ඇති බව මවා පෑමට ආණ්ඩුව උත්සාහ කළත් සමගි ජන බලවේගය සමගියෙන් ඉදිරියට යන අතර එහි කිසිදු බෙදීමක් නැතැයි විපක්ෂයේ ප්‍රධාන සංවිධායක අධි නීතීඥ ලක්ෂ්මන් කිරිඇල්ල මහතා අවධාරණය කර සිටියි.

ශ්‍රී ලංකා පොදු ජන පෙරමුණු ආණ්ඩුව ඇතැම් ජනමාධ්‍ය උපයෝගී කර ගෙන ඔවුන්ගේ සහ රටේ අර්බුද වසන් කර ගැනීමට උත්සාහ ගත්තත් විපක්ෂයේ කිසිදු බෙදීමක් නොමැති බව ද ඔහු සඳහන් කළේය.

ආණ්ඩුව දුර්වල වී විපක්ෂය ශක්තිමත් වනවාට බියෙන් හැට නම ලක්ෂය රැක ගැනීම සඳහා ආණ්ඩුව අද විපක්ෂයට නොයෙකුත් චෝදනා එල්ල කරමින් සිටින බව පෙන්වා දුන් ලක්ෂ්මන් කිරිඇල්ල මහතා සජිත් ප්‍රේමදාස මහතා ප්‍රමුඛ සමගි ජන බලවේගයට විශාල ග්‍රාමීය පිළිගැනීමක් තිබෙන බවත් බොරු අවලාද මගින් එම පිළිගැනීම නැති කිරීමට කිසිවකුට හැකියාවක් නොමැති බවත් කියා සිටියේය.